Fréttir

Á aðalfundi SÍMEY í húsakynnum miðstöðvarinnar á Akureyri í dag var farið yfir starfsemi SÍMEY og rekstur á árinu 2025.

Maryam Holton hóf störf sem verkefnastjóri/ráðgjafi í SÍMEY 23. mars sl. Henni líst vel á þau verkefni sem bíða hennar, starfsemi SÍMEY hafi víðari skírskotanir en hún hafi gert sér grein fyrir. Málefni fólks af erlendum uppruna eru Maryam sérstaklega hjartfólgin.

Það er greinilega ekki dottið úr tísku að sauma flíkur. Síður en svo. Þetta hefur verið rækilega undirstrikað núna á vorönn því á skömmum tíma voru fullbókuð saumanámskeið í SÍMEY hjá Kristínu Þöll Þórsdóttur klæðskera og biðlisti var á þau bæði.

Í þessari viku, dagana 13.-17. apríl, var haldið í SÍMEY fimm daga yfirgripsmikið sérhæft námskeið í þjónandi leiðsögn (e. Gentle Teaching). Námskeiðið var ætlað fólki sem hefur lokið grunn- og mentornámi í þjónandi leiðsögn og býr að minnsta kosti yfir fimm ára starfsreynslu í umönnun og stuðningi.

Síðastliðinn fimmtudag lauk dyravarðanámskeiði sem SÍMEY hefur árlega haldið í samstarfi við lögregluna á Norðurlandi eystra og stéttarfélagið Einingu-Iðju. Lágmarksaldur þeirra sem vilja starfa sem dyraverðir er 20 ár og skulu þeir hafa hreint sakavottorð. Að þessu sinni luku sextán þátttakendur náminu.

Sem fyrr hefur núna á vorönn verið mikill kraftur í kennslu íslensku sem annars máls í SÍMEY. Nú þegar hafa verið kennd tíu námskeið á önninni og fleiri námskeiðum lýkur í þessari viku. Ef allt gengur upp stefnir í að í annarlok í júní nk. hafi um tuttugu íslenskunámskeið verið kennd í SÍMEY.

Ríflega 160 starfsmenn í fiskvinnslu Samherja á Akureyri og Dalvík hófu vorið 2025 grunnnámskeið í fiskvinnslu. Um er að ræða kjarasamningsbundið námskeið sem öllum í fiskvinnslu er boðið að taka og byggir á samnefndri námskrá Fræðslumiðstöðvar atvinnulífsins.

Frá október á síðasta ári hafa SÍMEY, Dalvíkurbyggð og leikskólinn Krílakot á Dalvík boðið upp á starfstengt námskeið í íslensku fyrir fjóra starfsmenn Krílakots sem eru af erlendum uppruna. Öll kennslan fer fram á starfstíma leikskólans.

Eins og undanfarin ár bjóða SÍMEY og Farskólinn á Norðurlandi vestra í vetur upp á fjölbreytt stað- og vefnámskeið.

SÍMEY er aðili að verkefninu Velkomin til Akureyrar sem hefur það að markmiði að stuðla að samstarfi fyrirtækja og stofnana um hvernig best sé staðið að því að taka á móti starfsfólki af erlendum uppruna.