Fréttir

Sterkari starfsmaður er yfirskrift þriggja anna námsleiðar sem hefst í janúar 2018 fyrir starfsmenn grunnskóla Akureyrarbæjar aðra en kennara. Símenntunarmiðstöð Eyjafjarðar annast skipulagningu námsins í samstarfi við fræðslusvið Akureyrarbæjar og grunnskóla sveitarfélagsins og ber ábyrgð á því í samræmi við hlutverk og verkefni fræðslu- og símenntunarstöðva. Valgeir B. Magnússon, framkvæmdastjóri SÍMEY, og Soffía Vagnsdóttir, sviðsstjóri fræðslusviðs Akureyrarbæjar, undirrituðu í dag samning um námið. SÍMEY og Akureyrarbær hafa lengi átt í samstarfi um menntun starfsmanna bæjarins, þar á meðal starfsmanna fræðslusviðs. Á fyrstu mánuðum þessa árs voru greindar þarfir fyrir fræðslu starfsmanna grunnskóla bæjarins annarra en kennara og niðurstöður þeirrar vinnu hafðar að leiðarljósi við skipulag námsins Sterkari starfsmaður, sem er ein af námsleiðum Fræðslumiðstöðvar atvinnulífsins. Í náminu verður annars vegar lögð áhersla á upplýsingatækni og hins vegar samskipti og sjálfstyrkingu. Hluti af verkefninu er að náms- og starfsráðgjafi frá SÍMEY býður starfsfólki grunnskólanna upp á ráðgjöf um Sterkari starfsmann og mögulegt viðbótarnám. Sem fyrr segir hefst námið í janúar 2018. Því verður fram haldið haustið 2018 og lýkur að vori 2019. Námið er alls 100 klukkustundir, fer fram í grunnskólunum á skólatíma og mun skipulag skólastarfsins skapa þessum starfsmönnum skólanna svigrúm til þess að sækja námið. Námið tekur til vel á annað hundrað starfsmanna grunnskóla Akureyrarbæjar og er þeim að kostnaðarlausu. Akureyrarbær greiðir námskeiðsgjöld og sækir um endurgreiðslu til fræðslusjóða stéttarfélaga starfsfólksins – annars vegar Sveitamenntar – starfsmenntunarsjóðs starfsmanna sveitarfélaga á landsbyggðinni innan aðildarfélaga Starfsgreinasambandsins og hins vegar Mannauðssjóðs Kjalar. Valgeir B. Magnússon, framkvæmdastjóri SÍMEY, segir að Sterkari starfsmaður sé ánægjulegt framhald á farsælu samstarfi við Akureyrarbæ um fræðslu starfsfólks bæjarfélagsins. Þetta nýja verkefni sé viðamikið og skemmtileg áskorun fyrir SÍMEY og alla sem að því komi. Soffía Vagnsdóttir, sviðsstjóri fræðslusviðs Akureyrarbæjar, segist hafa miklar væntingar til námsins og samstarfsins við SÍMEY. „Ég hef væntingar til þess að námið skili okkur sterkari starfsmönnum og efli þá í starfi. Námið eins og það er sett upp er áhugavert og fjölbreytt og tekur mið af óskum starfsmannanna sjálfra, sem ég tel miklu máli skipta.“ Á þessari mynd sem var tekin við undirritun samningsins í dag standa að baki Soffíu og Valgeiri, talið frá vinstri: Kristján Sturluson, Helgi Þ. Svavarsson og Aníta Jónsdóttir, öll verkefnastjórar hjá SÍMEY og Sigurbjörg Rún Jónsdóttir, forstöðumaður þjónustu á fræðslusviði Akureyrarbæjar.

Í dag var undirritaður samningur milli búsetusviðs Akureyrarbæjar og SÍMEY sem kveður á um að SÍMEY mun greina þörf á fræðslu starfsmanna búsetusviðs með það að markmiði að vinna nýja fræðsluáætlun fyrir þá. Að samningnum kemur einnig Sveitamennt - starfsmenntunarsjóður starfsmanna sveitarfélaga á landsbyggðinni innan aðildarfélaga Starfsgreinasambands Íslands. Af hálfu SÍMEY skrifaði Valgeir B. Magnússon, framkvæmdastjóri SíMEY, undir samninginn en af hálfu búsetusviðs Akureyrarbæjar Jón Hrói Finnsson, sviðsstjóri. Samningurinn er liður í framhaldi á nokkurra ára samstarfi SÍMEY og búsetusviðs Akureyrarbæjar um fræðslumál starfsmanna þess. Fyrri fræðsluáætlun verður tekin upp og endurgerð í takt við breyttar áherslur og starfssvið starfsmanna. Þarfagreiningin verður unnin í nánu samstarfi ráðgjafa SÍMEY – Ingunnar Helgu Bjarnadóttur og Kristjáns Sturlusonar – og stýrihóps stjórnenda og starfsmanna búsetusviðs. Í það heila eru þeir starfsmenn búsetusviðs Akureyrarbæjar sem um ræðir á 14 vinnustöðum og heildarfjöldi þeirra er 290. Þar af eru um 80% þeirra félagsmenn Einingar-Iðju en aðrir eru félagsmenn Bandalags háskólamanna og njóta stuðnings Starfsþróunarseturs háskólamanna. Þarfagreiningin verður unnin á tímabilinu frá október 2017 til janúar 2018 og sem fyrr segir hefur hún það að markmiði að undirbúa gerð nýrrar fræðsluáætlunar sem verður unnin í framhaldinu.

SÍMEY á aðild að samningi sem var ritað undir í dagí Ungmennahúsinu Rósenborg um þverfaglegt samstarf aðila á Akureyri og Eyjafjarðarsvæðinu sem sinna málefnum ungs fólks á aldrinum 16-29 ára. Þetta verkefni gengur undir heitinu „Virkið“ og er því ætlað að vera vettvangur um samstarf þegar þessi hópur fólks þarf, stöðu sinnar vegna, á þjónustu að halda. Þjónustu sem snýr m.a. að atvinnuleit, skólagöngu, endurhæfingu eða annarri meðferð. Nafn verkefnisins vísar til þess að því er ætlað að hafa ungt fólk í virkni í samfélaginu. Með þessum samningi er fest á blað með formlegum hætti hvernig skuli bregðast við ef t.d. nemendur hætta námi, hvernig þá er unnt að vísa þeim veginn til virkni á öðrum vettvangi. Að sama skapi er verkefninu ætlað að vísa ungu fólki veginn inn í skólakerfið hyggist það innrita sig til náms. Eftirtaldir aðilar standa að samkomulaginu auk SÍMEY: Vinnumálastofnun Norðurlands eystra, Akureyrarbær (fjölskyldusvið og Ungmennahúsið - Rósenborg), Fjölsmiðjan á Akureyri, Sjúkrahúsið á Akureyri (geðdeild og BUG teymið), Heilbrigðisstofnun Norðurlands (Heilsugæslan), Virk, Menntaskólinn á Akureyri, Verkmenntaskólinn á Akureyri, Grófin geðverndarmiðstöð og Starfsendurhæfing Norðurlands. Meginmarkmið þessa samstarfs er að: • stuðla að bættri almennri þjónustu fyrir ungt fólk á aldrinum 16–29 ára • stuðla að bættri sérhæfðri þjónustu fyrir fólk á aldrinum 16–29 ára • efla þverfaglegt samstarf fagaðila stofnananna til hagsbóta fyrir hópinn.

Fyrir um tveimur árum var ýtt úr vör verkefninu Sjósókn sem að stóð starfsmenntasjóðurinn Sjómennt og Fræðslumiðstöð atvinnulífsins í samvinnu við Iðuna fræðslusetur og fjórar símenntunarstöðvar, þar á meðal SÍMEY. Verkefnið var fyrst og fremst fólgið í því að bjóða starfandi sjómönnum sem ekki höfðu lokið framhaldsskóla upp á raunfærnimat í ýmsum greinum sem tengjast sjávarútveginum, námskeið í fiskvinnslu og námsleiðina Menntastoðir. Horft var til þess að starfandi sjómenn gætu fengið yfirgripsmikla reynslu og þekkingu metna inn í námið, gætu stundað nám samhliða vinnu, fengið ráðgjöf um hvaða leiðir væru færar fyrir þá um námsval og síðast en ekki síst orðið hæfari starfsmenn. Valgeir B. Magnússon framkvæmdastjóri SÍMEY segir að um hafi verið að ræða ákveðið tilraunaverkefni og hafi SÍMEY haft ákveðið frumkvæði í málinu samkvæmt samningi við Sjómennt. Tvímælalaust hafi verkefnið skilað góðum árangri og sýnt fram á mikilvægi þess að gefa sjómönnum kost á að víkka út sjóndeildarhringinn og um leið að veita þeim upplýsingar um þá kosti sem bjóðist nú til dags, á tímum æ betri fjarskipta. Fyrir nokkrum árum hafi nám sjómanna jafnhliða sjómennsku ekki verið auðvelt vegna þess að flotinn hafi ekki verið í góðu netsambandi og afar kostnaðarsamt hafi verið að nýta sér netsamskipti. Þetta hafi hins vegar breyst mjög til batnaðar og um leið opnað á æ fleiri möguleika sjómanna til menntunar. Valgeir segir að nú þegar þessum fyrsta áfanga verkefnisins sé lokið sé nú verið að hefja annan áfanga þess sem af hálfu SÍMEY felist fyrst og fremst í því að vera í sambandi við aðrar símenntunarstöðvar og tala fyrir þessu verkefni. Jafnframt að bjóða fram ráðgjöf og kynningarefni sem geti nýst símenntunarmiðstöðvunum við næstu skref. Nú þegar segir Valgeir að mikill áhugi sé á að bjóða sjómönnum annars vegar hjá Ísfélaginu á Þórshöfn og hins vegar Síldarvinnslunni í Neskaupstað upp á raunfærnimat. Að þessu verði unnið á næstunni. „Við höfum þegar séð og vitum að fyrir marga sjómenn er töluvert átak að komast yfir þann þröskuld að ákveða að nýta sér þann kost að fara í raunfærnimat og fá þannig metna all þá miklu starfsreynslu sem þeir búa yfir. Síðan þegar komið er yfir þröskuldinn er það okkar reynsla að oft opnist sjómönnum nýr og áður óþekktur heimur. Reynslan sýnir að raunfærnimat er mörgum afar mikilvægt og dýrmætt. Okkar verkefni á næstunni verður að tala fyrir raunfærnimati fyrir sjómenn og í því skyni verðum við í sambandi við aðrar símenntunarmiðstöðvar,“ segir Valgeir B. Magnússon.

Óvenju mikill áhugi er í haust á námskeiðum í íslensku sem annað mál – námskeið sem hugsuð eru fyrir útlendinga sem hafa verið hér á landi til skamms eða lengri tíma. Um tugur námskeiða hefur verið settur upp – sum þeirra eru þegar hafin en önnur hefjast fyrstu dagana í október. Bæta þurfti við námskeiðum frá upphaflegum áætlunum vegna mikillar eftirspurnar. Flest eru þessi námskeið í húsakynnum SÍMEY við Þórsstíg á Akureyri en einnig verða námskeið á Dalvík og í Ólafsfrði. SÍMEY hefur tekið að sér að skipuleggja og halda utan um tungumálanámskeið fyrir starfsmenn ákveðinna fyrirtækja. Þá er tungumálanámið að hluta lagað að því starfsumhverfi sem starfsmennirnir vinna, farið í ýmis fagorð o.fl. Slík námskeið er SÍMEY fús að setja upp í auknum mæli ef áhugi er fyrir hendi. Kristín Björk Gunnarsdóttir verkefnastjóri hjá SÍMEY segir að íslenskunámskeiðin taki mið af kunnáttu þeirra sem þau sitja. Þannig sé boðið upp á grunnnámskeið fyrir þá sem hafa litla sem enga kunnáttu í íslensku og síðan sé byggt ofan á kunnáttuna á framhaldsnámskeiðum. Í fyrsta skipti í langan tíma er núna boðið upp á svokallað fjórða stigs námskeið í íslensku sem annað mál, fyrir þá sem þegar hafa góðan grunn í íslensku en vilja bæta orðaforðann, efla lesskilning og málfræðikunnáttu sína. Þess má í þessu sambandi geta að SÍMEY býður upp á íslenskukennslu ætlaða Pólverjum eingöngu þar sem kennarinn er pólskur og því unnt að útskýra betur fyrir þátttakendum íslenska málfræði og annað í kennslunni sem auðveldara er fyrir þá að meðtaka á móðurmálinu. Þessi aukna spurn eftir námskeiðum í íslensku sem annað tungumál helst væntanlega í hendur að nokkru leyti við góða stöðu á vinnumarkaði. Mikill fjöldi útlendinga er nú að störfum hér á landi, ekki síst í ferðaþjónustunni og hlutfallslega eru þeir fleiri að störfum hjá ferðaþjónustufyrirtækjum á haustin og fram á vetur, þegar skólarnir starfa. Kristín Björk segir að auk þess að bjóða útlendingum upp á íslenskunám bjóði SÍMEY þeim upp á ýmiskonar ráðgjöf, t.d. varðandi uppfærslu ferilskráa fyrir íslenskan vinnumarkað og aðstoði þá við við mat á námi erlendis frá.

Þann 21. september sl. var undirritaður samstarfssamningur Fræðslumiðstöðvar atvinnulífsins við fjórar símenntunarmiðstöðvar – þar á meðal Símenntunarmiðstöð Eyjafjarðar - um tilraunaverkefni um fræðslu starfsmanna í ferðaþjónustu. Framkvæmd samningsins verður í höndum Hæfniseturs ferðaþjónustunnar sem FA vistar. Hinar þrjár símenntunarmiðstöðvarnar sem eiga aðild að samningnum eru Miðstöð símenntunar á Suðurnesjum, Mímir – símenntun og Fræðslunetið – símenntun á Suðurlandi. Verkefnið hefur það að markmiði að ná til fyrirtækja í ferðaþjónustu með fræðslu og þjálfun af ýmsu tagi. Verkferlar verða samhæfðir, aðilar munu skiptast á efni, ráðgjöf og öðru sem að gagni kemur til auka hæfni starfsfólks í ferðaþjónustu og hvernig ná má til fleiri fyrirtækja í ferðaþjónustu. Valgeir B. Magnússon, framkvæmdastjóri SÍMEY, fagnar aðild SÍMEY að þessum samningi. Hann segir að unnið verði að framkvæmd hans í náinni samvinnu við Hildi Bettý Kristjánsdóttur, starfsmann Fræðumiðstöðvar atvinnulífsins, sem raunar er fyrrverandi starfsmaður SÍMEY. Á næstunni verður hafist handa við heimsóknir til ferðaþjónustufyrirtækja á starfssvæði SÍMEY og þeim kynntir möguleikar í fræðslu fyrir fyrirtækin og fjármögnun fræðslunnar. Í hlut SÍMEY kemur einnig að halda utan um tölulegar upplýsingar um heimsóknirnar og árangur af þeim. Samkvæmt verkáætlun lýkur þessu verkefni að rösku ári liðnu, í október 2018. Í janúar sl. var undirritaður samningur um Hæfnisetur ferðaþjónustunnar á grundvelli samþykktar Alþingis frá október 2016. Starfsemi þess miðar að því að uppfylla þarfir ferðaþjónustunnar fyrir aukna hæfni og auðvelda fyrirtækjum að fjárfesta í hæfni starfsmanna. Lögð er áhersla á samvinnu við greinina, aðila vinnumarkaðarins, fræðsluaðila og stjórnvöld við að þróa leiðtogafræðslu, námslotur fyrir starfsmenn í ferðaþjónustu, þrepaskipt starfsnám og raunfærnimat í starfsgreinum ferðaþjónustunnar.

Síðastliðið vor sendi SÍMEY bréf til allra þátttakenda á námskeiðum SÍMEY á vorönn 2017 þar sem kannaður var hugur þeirra til námsins. Með slíkri viðhorfskönnun vildi SÍMEY fá afstöðu þátttakenda til námsins og starfsemi SÍMEY í því skyni að bæta þjónustuna. Niðurstöður þessar könnunar gefa til kynna að almennt ríki almenn ánægja þeirra sem sækja nám í SÍMEY með námið. Þannig svöruðu 96% svarenda því játandi að námið í SÍMEY hefði verið þeim gagnlegt og álíka hátt hlutfall þátttakenda sagði að þeim hefði liðið vel í náminu í SÍMEY. Spurt var um námsmat og skipulag námsins og einnig aðgengi þátttakenda að starfsfólki. Einnig voru þátttakendur spurðir um traust til SÍMEY sem fræðsluaðila og hversu vel starfsfólk tæki tillit til þeirra þarfa. Í svörum við báðum þessum spurningum gáfu 92% svarenda jákvætt svar. Þá kom fram í könnuninni að um 90% þátttakenda lýstu ánægju sinni með aðstöðu til námsins í SÍMEY.

SÍMEY hefur fært sig um milli húsa á Dalvík – úr gamla húsi Dalvíkurskóla á jarðhæð Víkurrastar. Nýtt námsver var opnað þar formlega í gær, föstudaginn 15. september. Tónlistarskólinn á Tröllaskaga og Símenntunarmiðstöð Eyjafjarðar hafa undanfarin ár deilt húsnæði í gamla barnaskólahúsinu á Dalvík og nú hafa báðar stofnanir flust yfir í Víkurröst. Þar hafa SÍMEY og Tónlistarskólinn komið sér fyrir á neðri hæðinni og einnig hefur skólinn til afnota rými á efri hæðinni. Við formlega opnun hins nýja námsvers í gær sagði Valgeir Blöndal Magnússon fagnaðarefni að SÍMEY hefði nú afnot af þessu góða rými í Víkurröst en bæði er um að ræða minni og stærri kennslurými og skrifstofurými. Starfsemi SÍMEY á Dalvík er og hefur verið fjölbreytt. Boðið er upp á námskeið af ýmsum toga og er sérstök ástæða til þess að geta fjögurra anna náms í fisktækni sem hópur starfsmanna Samherja á Dalvík stundar. Þessar myndir voru teknar við formlega opnun námsversins á Dalvík. Á þessari mynd er Svanfríður Inga Jónasdóttir, verkefnastjóri SÍMEY á Dalvík, Kristín Björg Gunnarsdóttir, verkefnastjóri SÍMEY á Akureyri og Valgeir B. Magnússon, framkvæmdastjóri SÍMEY.

Aníta Jónsdóttir hefur tekið til starfa sem náms- og starfsráðgjafi /verkefnastjóri í SÍMEY. Hún hefur undanfarin tuttugu ár verið grunnskólakennari í Dalvíkurskóla, Hrafnagilsskóla og Naustaskóla á Akureyri. „Ég lauk kennaranámi frá Kennaraháskóla Íslands árið 1995 og er því eins og sagt er; meðal íslenski kennarinn, 47 ára gömul kona! Ég hef kennt án uppihalds í þennan tíma að einu ári undanskildu þegar ég fór veturinn 1999-2000 í diplómanám í náms- og starfsráðgjöf í Háskóla Íslands.“ Aníta er fædd og uppalin á Selfossi en málin æxluðust þannig að hún fór norður til Dalvíkur og hóf að kenna þar 1997. Þetta var mikill snjóavetur og Sunnlendingurinn Aníta hafði aldrei séð annað eins. Fannfergið dró þó ekki úr henni kjarkinn og hún kenndi á Dalvík í tvo vetur en síðan lá leiðin inn í Eyjafjarðarsveit þar sem hún kenndi við Hrafnagilsskóla og síðustu ár hefur Aníta verið við kennslu í Naustaskóla á Akureyri. „Síðastliðið vor tók ég þá ákvörðun að hvíla mig á kennslunni – án þess þó að hafa tryggt mér annað starf. Ég sá síðan þetta starf hjá SÍMEY auglýst, sótti um og mín var gæfan að fá það. Ég hef lengi horft til starfs Símenntunarmiðstöðvar Eyjafjarðar og einnig hefur lengi blundað í mér að vinna sem náms- og starfsráðgjafi með fullorðnu fólki. Þarna kom tækifærið upp í hendurnar á mér og mér líkar mjög vel að starfa hér. Á hverjum degi tekst ég á við nýja hluti sem er í senn gefandi og þroskandi. Starfið er víðfeðmt, allt frá einstaklingsráðgjöf í að skipuleggja námskeið fyrir vinnustaði. Eitt af þeim verkefnum sem ég kem til með að vinna með er raunfærnimat sem mér þykir frábært „verkfæri“.“ Aníta hefur í gegnum tíðina kennt ýmislegt en rauði þráðurinn hefur þó verið annars vegar íslenska og hins vegar kristinfræði. „Ég hef alltaf haft mikinn áhuga á íslensku en hafði ekki bakgrunn í kristinfræðinni að öðru leyti en því að frá unglingsaldri tók ég þátt í kirkjustarfi á Selfossi. Þegar ég síðan var í námi í náms- og starfsráðgjöf var ég beðin um að vera þann vetur meðhjálpari í Selfosskirkju. Það var skemmtileg reynsla og og núna starfa ég sem einn af meðhjálpurum Glerárkirkju hér á Akureyri og einnig er ég meðhjálpari í Munkaþverárkirkju.“ Undanfarin ár hefur Aníta kennt námskeið sem kallast „Jákvæður agi“ – bæði fyrir kennara og foreldra. „Í tengslum við þetta námskeið kviknaði áhugi minn á foreldrafræðslu og uppeldisráðgjöf og meðfram vinnu hef ég stundað meistaranám í þessum fræðum í Háskóla Íslands. Ég ákvað hins vegar að taka mér frí frá náminu á þessari önn á meðan ég væri að komast inn í nýtt starf hér í SÍMEY,“ segir Aníta Jónsdóttir.

Þann 15. ágúst sl. voru 27 starfsmenn í fiskvinnslu Útgerðarfélags Akureyringa og Samherja á Dalvík brautskráðir úr raunfærnimati í fiskvinnslu, þar af 18 starfsmenn á Akureyri en 9 á Dalvík. Raunfærni felur í sér samanlagða færni sem einstaklingur hefur náð með t.d. starfsreynslu, starfs-, frístunda- eða skólanámi, félagsstörfum og fjölskyldulífi. Þeir starfsmenn í fiskvinnslu sem luku raunfærnimatinu með formlegum hætti um miðjan ágúst hafa margir að baki langa starfsreynslu í fiskvinnslu og því aflað sér mikillar þekkingar. Síðastliðið vor tóku ráðgjafar hjá SÍMEY viðtöl við umrædda starfsmenn og síðan var unnið úr þeim. Almennt gekk raunfærnimatið mjög vel og leiddi í ljós mikla færni starfsmannanna, að sögn Svanfríðar Ingu Jónasdóttur, verkefnastjóra hjá SÍMEY. Hún segir að síðustu daga hafi verið rætt við þessa starfsmenn og þeim kynntir möguleikar á því að innritast í nám í fisktækni, sem er fjögurra anna nám, skipulagt með vinnu. Um 20 starfsmenn Samherja á Dalvík hafa stundað slíkt nám þar og eru nú hálfnaðir með það. Þessir nemendur útskrifast sem fisktæknar frá Menntaskólanum á Tröllaskaga næsta vor, en hann er einskonar móðurskóli þessa náms. Svanfríður segir mjög góða reynslu af fisktæknináminu á Dalvík og hún muni koma að góðum notum við skipulagningu sambærilegs náms á Akureyri, ef af því verði en það mun skýrast á næstu dögum. Kristín Björk Gunnarsdóttir, verkefnastjóri hjá SÍMEY, tók þessar myndir við við brautskráninguna 15. ágúst sl. Auk fiskvinnslufólksins og starfsmanna SÍMEY var Ásdís V. Pálsdóttir verkefnastjóri hjá Fisktækniskóla Íslands viðstödd brautskráninguna.