Fréttir

Í síðustu viku var boðið upp á fræðslu í SÍMEY fyrir starfsfólk grunnskóla Akureyrarbæjar, aðra en kennara. Fræðslan er liður í fræðsluáætlun 2017-2020 fyrir starfsfólk grunnskólanna, sem er ávöxtur umfangsmikils samstarfs SÍMEY og og fræðslusviðs Akureyrarbæjar um fræðslu starfsmanna bæjarfélagsins. Samstarf SÍMEY og fræðslusviðs Akureyrarbæjar á sér nokkurra ára sögu. Í nóvember 2016 var undirritaður samningur SÍMEY við fræðslusvið Akureyrarbæjar, Mannauðssjóð Kjalar og Sveitamennt um áframhaldandi samstarf í fræðslumálum – svonefndan Fræðslustjóra að láni. Í framhaldi af samningnum var unnin þarfagreining innan grunnskóla Akureyrarbæjar samkvæmt hugmyndafræði Markviss. Gerð var viðhorfskönnun meðal starfsfólks skólanna og unnin starfagreining. Í kjölfarið var síðan myndaður stýrihópur sem í voru sjö starfsmenn grunnskólanna, aðrir en kennarar, einn skólastjóri og einn starfsmaður fræðslusviðs Akureyrarbæjar. Hópurinn vann náið með ráðgjöfum SÍMEY að mótun fræðslustefnu fyrir starfsfólk grunnskólanna til næstu þriggja ára. hann hittist reglulega frá janúar til júní á þessu ári til þess að vinna að fræðsluáætlunni og einnig var farið í heimsóknir í grunnskólana og hún kynnt. Nú er sem sagt byrjað að vinna eftir fyrirliggjandi fræðsluáætlun og var í síðustu viku boðið upp á þrjú ólík námskeið fyrir starfsfólk grunnskólanna, aðra en kennara. Í fyrsta lagi var Eyrún Kristína Gunnarsdóttir með fræðslu um greiningar og sérþarfir barna, Helga Hauksdóttir og Helgi Þ. Svavarsson ræddu um fjölmenningu í skólum og Edda Björgvinsdóttir flutti fyrirlestur sem hún kallaði „Húmor og vinnugleði“. Sem fyrr segir er sú fræðsluáætlun sem nú er farið að vinna eftir til þriggja ára – sex annir. Síðasta önnin verður að vori árið 2020. Sú fræðsla sem boðið verður upp á tekur mið af þeim óskum og þörfum sem komið hafa fram bæði í áðurnefndum stýrihópi og beint frá starfsmönnum grunnskóla Akureyrarbæjar.

Í dag voru brautskráðir 127 þátttakendur úr ýmsum námsleiðum hjá Símenntunarmiðstöð Eyjafjarðar. Brautskráningin var í húsnæði SÍMEY við Þórsstíg á Akureyri. Námsleiðirnir sem brautskráningarnemarnir 127 luku eru „Menntastoðir“- kvöldnám, leikskólaliða- og stuðningsfulltrúabrú, félagsliðabrú, „Help start“-grunnur og framhaldshópur, sölu- markaðs og rekstrarnám, Fab Lab - opin smiðja - hópur 1 og 2, textílsmiðja, opin smiðja – málmsuðusmiðja, alvöru bóhaldsnámskeið - 75 klst. nám sem þjálfar þátttakendur í nútímabókhaldi - unnið í samstarfi við Tölvufræðsluna og „Mannlegi millistjórnandinn“. Fyrir og eftir brautskráninguna í dag spilaði og söng fyrir gesti hinn ungi og bráðefnilegi tónlistarmaður Birkir Blær Óðinsson. Auk Valgeirs Magnússonar framkvæmdastjóra SÍMEY fluttu ávörp við brautskráninguna annars vegar Helga Erlingsdóttir hjúkrunarforstjóri Öldrunarheimila Akureyrar og hins vegar Ósk Helgadóttir sem brautskráðist í dag af leikskólaliða- og stuðningsfulltrúabrú. Sí- og endurmenntun 21. aldar Í ávarpi sínu ræddi Helga Erlingsdóttir um gildi menntunar frá ýmsum hliðum en fræðslumál starfsmanna Öldrunarheimila Akureyrarbæjar eru mikið á hennar borði. Helga sagði að símenntun starfsfólk væri mikilvægari en nokkru sinni áður – á tíma hraðra tæknibreytinga. Í því sambandi nefndi hún að árið 2007 hafi iphone-síminn komið fram á sjónarsviðið – fyrir aðeins áratug – en nú eigi nánast hver maður snjallsíma. Áfram haldi tæknibyltingin, sagði Helga, og nú sé farið að tala um að innan fárra ára verði sjálfkeyrandi ökutæki á götunum. Helga sagðist telja að símenntun 21. aldarinnar yrði fyrst og fremst í gegnum mismunandi samfélagsmiðla og snjalltæki þannig að fólk gæti stundað sína endur- og símenntun þegar því hentaði. „Geng glöð út í sumarið“ Sem fyrr segir brautskráðist Ósk Helgadóttir í dag af leikskólaliða- og stuðningsfulltrúabrú. Hún rifjaði upp að hún hefði lokið grunnskólanámi árið 1979 og síðan hafi lífið tekið við með því sem það bauð upp á þeim tíma. Menntun hafi ekki verið sér ofarlega í huga á þessum tíma. Síðan hafi hún eignast fjölskyldu og komið börnum upp en alltaf hafi undir niðri blundað í sér löngunin til að takast á við nám. Hins vegar hafi hún ekki haft trú á sjálfri sér til þess að setjast aftur á skólabekk. En loksins hafi hún ákveðið að byrja með því að taka nokkur fög í fjarnámi í VMA og í framhaldi af því skráði hún sig til náms í SÍMEY. Þetta var árið 2014. Síðan sagðist Ósk hafa tekið nám af ýmsum toga í SÍMEY og sagðist hún vera starfsfólki SÍMEY og samnemendum ævarandi þakklát fyrir stuðninginn, kennsluna og frábæra samveru. „Það er mikið átak að rífa sig af stað,“ sagði Ósk, „en ég er mun sterkari manneskja en áður og geng glöð út í sumarið.“ Uppskera árangurs „Dagurinn í dag er uppskera árangurs, þið hafið lagt á ykkur mikla vinnu, farið út fyrir þægindarammann og dagurinn í dag gæti líka verið dagur nýrra markmiða og væntinga. Þið hafið bætt við ykkur þekkingu og öðlast hæfni og getu til að að takast á við ný verkefni og án efa skapað ykkur ný tækifæri í lífinu. Dagurinn í dag er líka dagur stoltsins. Það getur verið mikið átak að taka upp þráðinn og hefja nám eftir hlé, það krefst dugnaðar og seiglu. Fólk þarf að endurskipuleggja líf sitt, reyna á nýja færni og stundum yfirvinna huglæga þröskulda sem geta fylgt okkur. Fyrir okkur sem vinnum á þessum vettvangi þá er þessi dagur líka afar mikilvægur en á þessum degi kristallast tilgangurinn með starfi okkar, þegar við finnum, heyrum og sjáum tilganginn með þessu öllu, sjáum þær breytingar sem hafa orðið hjá ykkur. Einhvers staðar segir að það að geta haft áhrif á aðra mannskju til góðs sé það mikilvægasta í lífinu. Með hvatningu, ráðgjöf, viðurkenningu, kennslu eða öðru. Að þessu leyti eru forréttindi að vinna á þessum vettvangi okkar, dagurinn í dag dregur það sterkt fram,“ sagði Valgeir B. Magnússon, framkvæmdastjóri SÍMEY, m.a. þegar hann ávarpaði brautskráningarnema og gesti við brautskráninguna í dag. Að takast á við breyttan heim Valgeir sagði það staðreynd að samfélagið breytist hratt í takti við tækniframfarir á öllum sviðum. „Störf breytast, breyttar kröfur á vinnustöðum um tiltekna þekkingu, hæfileikinn til að aðlagast verður sífellt mikilvægari. Afar og ömmur sitja með snjalltækin í forundran með barnabörnin á öxlinni. Hvernig eigum við að takast á við breytilegan heim? Valdefling einstaklinga er í okkar huga sem í þessum geira störfum lykilatriði í þessu samhengi. Með því stuðla að valdeflingu einstaklinga og sjálfsuppbyggingu þá erum við að auka möguleika fólks á því að hafa fleiri valkosti, geta tekið ígrundaðri ákvarðanir, aukum hæfni í ákvarðanatöku og aðlögunarhæfni, aukið sjálfstraust og samskiptafærni. Við megum ekki um of óttast þann heim sem við lifum í. Fremur þurfum við að hugsa hvernig við getum tekið þátt í honum með uppbyggilegum hætti og nýtt hæfileika okkar sem best, fyrir okkur sjálf og umhverfi okkar. Nám hefur gjarnan mikil áhrif á sjálfsmynd einstaklinga, uppgötvun nýrra hæfileika sem maður hélt að væru ekki til staðar eða horfnir er afar jákvæð og hefur sterk áhrif á einstaklinga. Viðhorf gagnvart starfsumhvefi breytist, öryggi og viðsýni tekur völdin í huga einstaklinga. Ný tengsl myndast fólks á milli og sá þáttur að læra af öðrum skal ekki vanmeta í námi,“ sagði Valgeir. 3500 manns nýttu sér þjónustu SÍMEY 2016 Valgeir gat þess að SÍMEY væri á sínu átjánda starfsári og á þessum árum hafi orðið markverðar breytingar í starfseminni og hún vaxið. Á árinu 2016 sagði Valgeir að þátttakendur eða þeir sem nýttu sér þjónustu SÍMEY hafi verið um 3500 manns. „Við höfum verið leiðandi í samstarfi við atvinnulíf varðandi ýmis þróunarverkefni, fjölmenningu, aðstoð við flóttafólk og við sinnum fullorðinsfræðslu fatlaðra. Verkefni okkar eru á víðum grunni, stór hluti starfseminnar er að bjóða fullorðnu fólki upp á vottaðar námsleiðir frá Fræðslumiðstöð atvinnulífsins, raunfærnimat, náms- og starfsráðgjöf, almennt námskeiðahald fyrir samfélagið og einnig klæðskersniðnar lausnir fyrir fyrirtæki og stofnanir í formi námskeiðahalds, fyrirtækjaskóla og mannauðsráðgjafar. Þá bjóðum við upp á íslensku fyrir útlendinga og sjáum um námskeiðahald fyrir Fjölmennt, sem er fullorðinsfræðsla fyrir fatlaða.“ Breytingar á starfsmannahaldi Tólf starfsmenn eru hjá SÍMEY og auk þess um 100 verktakar – til skamms eða lengri tíma. Valgeir gat þess að þær breytingar hafi orðið á starfsmannahaldinu hjá SÍMEY að Anna Lóa náms- og starfsráðgjafi lét af störfum eftir um tveggja ára starf en tveir nýir starfsmenn hafi verið ráðnir til starfa, Kristján Sturluson og Aníta Jónsdóttir. Þakkaði Valgeir Önnu Lóu fyrir hennar störf undanfarin tvö ár og óskaði nýjum starfsmönnum velfarnaðar.

Núna á vorönn bauð SÍMEY í fyrsta skipti upp á námskeiðið „Mannlegi millistjórnandinn“ í samvinnu við Hagvang. Ellefu þátttakendur voru á námskeiðinu og komu þeir frá Akureyri og úr nágrannabyggðum. Námskeiðið fékk almennt afar jákvæða umsögn þátttakenda. „Mannlegi millistjórnandinn“ verður aftur á dagskrá í haust. Helsta markmiðið með námskeiðinu er að styrkja nýja stjórnendur og millistjórnendur fyrirtækja og stofnana í daglegum störfum sínum. Námskeiðið er í fjórum lotum. Í fyrsta lagi er farið í svokallaða orkustjórnun þar sem áherslan er á hvernig stjórnandinn getur nýtt hana til að auka gæði vinnunnar, afköst og framlegð og um leið aukið starfsgleði og stuðlað að auknu heilbrigði sínu og sinna starfsmanna. Í annan stað er horft til mannauðsstjórnunar - hlutverks millistjórnandans og daglegra viðfangsefna hans í tengslum við stjórnun fólks. Í þriðja lagi er fjallað um samskipti - ábyrgð einstaklinga þegar kemur að samskiptum og mikilvægi þess að vera meðvitaður um eigin samskiptatækni. Í fjórða lagi er fjallað um um leiðtogann og þjónandi forystu, m.a. hvernig stjórnendur vinni starfsfólk á sitt band og laði fram það besta í hverjum starfsmanni. Erla Björnsdóttir verkefnastjóri í tölvu- og upplýsingadeild Sjúkrahússins á Akureyri var ein þeirra sem sótti fyrsta „Mannlegi millistjórnandinn“ námskeiðið núna á vorönn. Hún segir að námskeiðið hafi verið afskaplega lærdómsríkt og nýtist tvímælalaust vel bæði stjórnendum og millistjórnendum í fyrirtækjum og stofnunum. Erla, sem vinnur m.a. að gæðamálum er lýtur að rafrænni sjúkraskrá, er í miklum mannlegum samskiptum á sínum vinnustað, enda er hún verkefnastjóri þvert á allar deildir sjúkrahússins. Hún segir að námskeiðið nýtist sér mjög vel en telur að ekki hefði sakað þótt farið hefði verið dýpra í samskiptamál, þau hafi verið og séu æ stærri þáttur í starfi stjórnenda og millistjórnenda. Hér eru nánari upplýsingar um „Mannlega millistjórnandann og skráning á næsta námskeið sem hefst í september nk.

Síðastliðið sumar hafði SÍMEY frumkvæði að því að boðið var í fyrsta skipti upp á knattspyrnuæfingar fyrir fólk sem á eða hefur átt við geðræn vandamál að stríða. Björk Nóadóttir, þjálfari og knattspyrnukona, annaðist þjálfunina. Nú hefur verið ákveðið að endurtaka leikinn og verður fyrsta æfingin í sumar að viku liðinni, miðvikudaginn 31. maí kl. 19:00 á grasvellinum á KA-svæðinu – sunnan KA-heimilisins.Þjálfarar verða Björk Nóadóttir og Haukur Snær Baldursson. Knattspyrnuæfingarnar eru þátttakendum að kostnaðarlausu. Því er um að gera að nýta þetta frábæra tækifæri og æfa knattspyrnu í sumar undir stjórn afbragðs góðra þjálfara. Á fésbókarsíðu verkefnisins „Fótbolti án fordóma á Akureyri“ kemur fram að markmiðið með knattspyrnuæfingunum sé að hafa gaman, bæta heilsu, virkja fólk félagslega og draga úr fordómum. Tekið er fram að allir séu velkomnir á æfingarnar, engar kröfur séu um þátttöku, þeim sem ekki treysti sér inn á völlinn sé velkomið að mæta á staðinn, horfa á og hafa gaman.

Eins og komið hefur fram í fréttum hafa forráðamenn Samherja gengið frá lóðarleigusamningi við Dalvíkurbyggð um 23 þúsund fermetra lóð á hafnarsvæðinu á Dalvík fyrir nýtt og fullkomið fiskiðjuver. Áætluð fjárfesting í nýju húsnæði og tæknibúnaði er um 3,5 milljarðar króna. Auk þess er væntanlegur í næsta mánuði nýr Björgúlfur EA til Dalvíkur sem mun leysa af hólmi núverandi Björgúlf EA sem hefur aflað hráefnis fyrir landvinnsluna á Dalvík í um fjóra áratugi. Heildarfjárfesting Samherja í veiðum og vinnslu á Dalvík mun því nema fast að 6 milljörðum króna. SÍMEY sendir Samherja af þessu tilefni einlægar heillaóskir. Samherji og SÍMEY hafa lengi átt afar farsælt samstarf um menntun starfsmanna fyrirtækisins. Má í því sambandi nefna að nú er að ljúka annarri önn í fjögurra anna fisktækninámi á Dalvík þar sem um 20 starfsmenn Samherja á Dalvík hafa setið á skólabekk og aflað sér aukinnar þekkingar og víkkað út sjóndeildarhringinn. Í þetta nám fóru starfsmenn Samherja að undangengnu raunfærnimati þar sem hæfni þeirra og reynsla var metin. Tuttugu og þrír starfsmenn Samherja í Útgerðarfélagi Akureyringa hafa að undanförnu farið í samskonar raunfærnimat, eins og greint var frá hér á heimasíðunni í liðinni viku. Fisktækninám á Dalvík, sem SÍMEY heldur utan um, er unnið í samvinnu við Fisktækniskóla Íslands. Námið – sem er meðfram vinnu þátttakenda - hefur gengið afskaplega vel og hafa nemendur verið afar áhugasamir og lagt mikið á sig. Sömuleiðis hefur Samherji stutt starfsmenn sína í náminu og ýtt undir að þeir sæktu sér aukna þekkingu. Þegar Samherji gekk frá lóðarleigusamningi sínum við Dalvíkurbyggð á dögunum kom fram í máli Þorsteins Más Baldvinssonar forstjóra Samherja að árangur fyrirtækisins í landvinnslunni á Dalvík væri fyrst og fremst starfsfólki fyrirtækisins að þakka, sem hefði staðið sig frábærlega. Hann sagði að með nýrri vinnslu myndu störfin breytast, þau yrðu fjölbreyttari og meira krefjandi en jafnframt auðveldari líkamlega. Fiskvinnslan hefur á undanförnum árum tekið miklum breytingum með aukinni tæknivæðingu. Þessi þróun mun halda áfram með tilheyrandi breytingu á störfum. Þess vegna er hér eftir sem hingað til mikilvægt að starfsmenn sæki sér aukna menntun og þekkingu þannig að þeir séu í stakk búnir að takast á við breytta tíma.

Síðastliðið miðvikudagskvöld var síðasta samverustundin í opinni textílsmiðju – námskeiði sem Soffía Margrét Hafþórsdóttir fatahönnuður og Kristín Þöll Þórsdóttir klæðskeri hafa í fyrsta skipti kennt núna á vormisseri. Þær eru sammála um að vel hafi tekist til og eru hæstánægðar með útkomuna. Reynslan af þessu námskeiði hefur verið svo góð að ákveðið hefur verið að endurtaka leikinn næsta haust og er nú þegar hægt að skrá sig á það námskeið, sem hefst í byrjun september og verður í það heila 80 klst. Sem fyrr segir lauk þessari fyrstu opnu smiðju í textíl í SÍMEY sl. miðvikudagskvöld. Þá voru mættar fjórar af átta konum sem sóttu námskeiðið. Það fór ekki á milli mála að þær voru allar hæstánægðar með námskeiðið og sögðust hafa lært margt og mikið og nokkrar af þeim glæsilegu flíkum sem urðu til á námskeiðinu vitna um það. Soffía og Kristín kenndu m.a. sauma, þrykk, sníðagerð, efnisfræði og hugmynda- og hönnunarvinnu að því ógleymdu að farið var í hina nýju Fab-Lab smiðju í Verkmenntaskólanum á Akureyri Soffía og Kristín hafa áður starfað saman því þær deildu um tíma vinnustofu í Gilinu og héldu þá tólf tíma námskeið. Þessa reynslu nýttu þær í opnu textílsmiðjuna í SÍMEY. Sem fyrr segir verður önnur sambærileg smiðja í haust og er ástæða til að hvetja þá sem hyggjast fara í hana að geyma ekki að skrá sig.

Í þessari viku hafa 23 starfsmenn í fiskvinnslu hjá Útgerðarfélagi Akureyringa verið í raunfærnimati Í SíMEY en í sem stystu máli er raunfærni samanlögð færni sem einstaklingur hefur náð með ýmsum hætti, s.s. starfsreynslu, starfsnámi, frístundanámi, skólanámi, félagsstörfum og fjölskyldulífi. Starfsreynsla þessara starfsmanna er misjafnlega löng en í mörgum tilfellum hafa þeir starfað í fiskvinnslu til fjölda ára. Þetta er ekki í fyrsta skipti sem starfsmenn í fiskvinnslu fara í gegnum raunfærnimat hjá SÍMEY, það hafa áður gert starfsmenn í fiskvinnslu Samherja á Dalvík og á þessu ári er miðað við að níu starfsmenn þar fari í gegnum slíkt mat. Raunfærnimat er öflugt „verkfæri“ til þess að meta færni og reynslu einstaklinga í því skyni að bæta við sig námi eða þekkingu af öðrum toga. Fólk í ólíkum geirum atvinnulífsins hefur farið í gegnum raunfærnimat og almennt hefur reynslan af því verið afar góð.

Í gær lauk fjórði hópurinn námi í markþjálfun í SÍMEY. Níu luku náminu að þesu sinni og fengu viðurkenningaskjöl því til staðfestingar. Haustið 2015 var fyrsta slíka námskeiðið haldið á Akureyri sem var jafnframt fyrsta markþjálfanámskeiðið utan Reykjavíkur. Árið 2004 settti Matilda Gregersdotter, sem heldur utan um námið, á stofn fyrirtækið „Leiðtoga“ sem síðar breyttist í Evolvia ehf. og hefur það á sínum snærum markþjálfanám hér á landi. Evolvia hefur ACSTH vottun frá International Coach Federation sem þýðir að ACC markþjálfanám og framhaldsnám í markþjálfun hjá Evolvia er viðurkennt og uppfyllir öll skilyrði og kröfur ICF (International Coach Federation). Námið í SÍMEY er grunnnám í markþjálfun, svokallað ACC markþjálfanám. Markþjálfun má í stuttu máli lýsa sem samtalsaðferð þar sem einstaklingurinn lærir m.a. ýmislegt um sjálfan sig, varðandi lífið sjálft og starf hvers og eins. Í hópi þeirra nemenda sem luku námi í markþjálfun í SÍMEY í gær voru Inga Karlsdóttir, þjónustustjóri í fyrirtækjamálum í Landsbankanum á Akureyri, og Axel Ernir Viðarsson, slökkviliðsmaður í Slökkviliði Akureyrar Þau voru mjög ánægð með námið og segja öllum hollt að fara í það: Inga: Ég þekki nokkra markþjálfa og hafði sjálf farið til þeirra. Aðferðafræðin sem þetta byggir á þykir mér mjög áhugaverð og auk þess hafði ég lært jákvæða sálfræði og hluti af því námi var að fá innsýn í markþjálfun. Mér fannst þetta því tengjast vel og vera spennandi, þess vegna ákvað ég að slá til. Axel Ernir: Ég tek undir það sem Inga segir að ég þekki nokkra sem höfðu tekið markþjálfun og undantekningalaust mæltu þeir eindregið með þessu námi. Að endingu ákvað ég að slá til og sé svo sannarlega ekki eftir því. Námið felst að töluverðu leyti í því að fara inn á við og það veitir góða sýn á svo fjölmargt. Maður fer að horfa öðruvísi á hlutina og mér finnst þetta nám stuðla að bættum samskiptum. Almennt vil ég segja að námið var gríðarlega skemmtilegt og lærdómsríkt fyrir alla. Inga: Ég tel að sú aðferðafræði sem markþjálfun byggir á styrki alla. Markþjálfun er frábær í verkfærakistu stjórnenda en tvímælalaust nýtist hún öllum vel. Maður fer mikið inn á við og skoðar sjálfan sig og við erum látin fara djúpt í tilfinningar og upplifanir og finna neistann í sjálfum okkur til þess að fara þangað sem okkur langar að fara. Í mínum huga er þetta aðferðafræði sem hjálpar fólki til að finna neistann sinn. Axel Ernir: Margir fara í þetta nám til þess að vinna sem markþjálfar í framtíðinni en aðrir fara í námið til þess að efla sjálfsöryggi og þetta er tvímælalaust góð leið til þess. Sjálfur hef ég alltaf hugsað mér að vinna sem markþjálfi til hliðar við mitt starf sem slökkviliðsmaður, með það í huga að hjálpa fólki að bæta líf sitt og ná árangri. Inga: Ég fór í námið fyrst og fremst með það í huga að tileinka mér þessa aðferðafræði. Ég hafði ekki í huga að starfa sem markþjálfi. En því meira sem ég hef lært í þessu því meiri áhuga hef ég á að stunda markþjálfun með vinnu. Það er mjög gefandi þegar manni tekst að hjálpa fólki að kveikja neistann og sjá hlutina gerast. Axel Ernir: Námið er töluvert viðameira og gefur manni enn meira en ég átti von á. Það veiti manni nýja sýn og bætir færni á mörgum sviðum. Fyrirfram átti ég von á að námið myndi gefa mér umtalsvert en það hefur gefið mér margfalt meira en ég átti von á. Það er einfaldlega ein besta ákvörðun sem ég hef tekið að fara í þetta nám. Þetta er vissulega krefjandi og okkur var sagt að við skyldum taka frá kvöldin þá daga sem væri kennt því við myndum klára alla okkar orku. Það reyndist alveg rétt. Það fer mikil orka í að gefa svona mikið af sér en það var margfaldlega þess virði. Inga: Með þessu námi erum við í raun orðin markþjálfar en til þess að fá svokallaða ACC-vottun þurfum við að safna 100 klukkutímum í að markþjálfa aðra og það hef ég fullan hug á að gera. Axel Ernir: Ég tek undir það að ég hef fullan hug á að safna þessum tímum og fá ACC-vottun. Hver og einn getur gert þetta á sínum hraða, það eru engin tímamörk á því hvenær fólk að ljúka tilskildum fjölda tíma í markþjálfun.

Að loknum ársfundi SÍMEY í gær, 15. maí, flutti Sveinn Aðalsteinsson, framkvæmdastjóri Fræðslumiðstöðvar atvinnulífsins, erindi með yfirskriftinni „Fyrirtækið sem námsstaður“. Að því loknu voru pallborðsumræður þar sem Sveinn sat ásamt fulltrúum mismunandi skólastiga. Yfirskrift pallborðsins var „Fræðslustigin tala saman um nám til eflingar atvinnulífinu“. Kristján Þór Júlíusson, menntamálaráðherra, hlýddi á pallborðsumræðurnar og ávarpaði viðstadda. Sveinn Aðalsteinsson hefur gegnt starfi framkvæmdastjóra Fræðslumiðstöðvar atvinnulífsins í tæpt ár en við því tók hann 1. júní 2016 af Ingibjörgu E. Guðmundsdóttur sem hafði verið framkvæmdastjóri frá stofnun Fræðslumiðstöðvarinnar en lét af störfum fyrir aldurs sakir. Áður hafði Sveinn verið framkvæmdastjóri fræðslusjóðsins Starfsafls, starfsmenntar Flóabandalagsins og Samtaka atvinnulífsins, frá árinu 2006. Í því starfi vann hann m.a. að uppbyggingu og framkvæmd verkefnisins "Fræðslustjóri að láni" og og jafnframt var hann verkefnisstjóri sameiginlegrar vefgáttar fræðslusjóða, Áttin.is. Áður en Sveinn kom til Starfsafls var hann skólameistari Garðyrkjuskólans á Reykjum (síðar Landbúnaðarháskóla Íslands) frá 1999 til 2005. Í erindi sínu kynnti Sveinn starfsemi Fræðslumiðstöðvar atvinnulífsins en hún var sett á stofn árið 2002 af Alþýðusambandi Íslands og Samtökum atvinnulífsins. Fræðslumiðstöðin starfar náið með símenntunarmiðstöðvunum um allt land og eins og Sveinn orðaði það er hún að búa til verkfæri fyrir þær er lýtur að námsskrám, náms- og starfsráðgjöf og raunfærnimati. Sveinn tók þannig til orða að fyrirtækin í landinu væru risi sem þyrfti að virkja betur í fræðslu sinna starfsmanna. Hann sagði að víða væri margt vel gert í atvinnulífinu í þessum efnum en átaks væri þörf til að gera enn betur. Áskorunin sem þeir sem ynnu að fræðslumálum væri að gera fyrirtækin meðvituð um fræðsluhlutverk sitt gagn sínum starfsmönnum. Sveinn nefndi að í ljósi mikils vaxtar í ferðaþjónustunni á síðustu misserum og árum væri töluverð áhersla á fræðslumál í ferðaþjónustu og þar væri mikið óunnið og mörg sóknarfæri. Sem fyrr segir var Sveinn í pallborði að loknu erindi sínu en þar voru einnig Jón Baldvin Hannesson, skólastjóri Giljaskóla á Akureyri, Sigríður Huld Jónsdóttir, skólameistari VMA, Eyjólfur Guðmundsson, rektor Háskólans á Akureyri og Valgeir B. Magnússon, framkvæmdastjóri SÍMEY. Stjórnandi pallborðsumræðna var Svanfríður Inga Jónasdóttir, verkefnastjóri SÍMEY við utanverðan Eyjafjörð. Rauður þráður í máli þátttakenda í pallborði var að margt í núverandi skólakerfi þarfnaðist nýrrar sýnar og uppstokkunar og hvatt var til þess að skólastigin myndu í auknum mæli tala saman og samræma hlutina. Í því fælust mikil sóknarfæri og taldi Eyjólfur rektor HA að með því að auka samtal og samræmingu skólastiganna í Eyjafirði væri svæðinu mögulegt að taka ákveðið frumkvæði og skipa sér í forystusveit í þessum efnum í landinu. Taldi Eyjólfur til mikils vinnandi að ná slíku fram og allar forsendur væru til þess að það væri unnt. Kristján Þór Júlíusson, menntamálaráðherra, sagðist lengi hafa fylgst með starfsemi SÍMEY og fullorðinsfræðslu almennt. Hann tók undir og hvatti til þess að skólastigin töluðu saman þannig að verkefnaskipting þeirra væri öllum ljós og skýr.

„Hlutverk SÍMEY, sem staðið hefur óbreytt í mörg ár, er að efla símenntun og auka samstarf milli atvinnulífs og skóla og styrkja þannig samkeppnishæfni fyrirtækja og stofnana á svæðinu. SÍMEY stuðlar að því að einstaklingar á Eyjafjarðarsvæðinu hafi aðgang að hagnýtri þekkingu á öllum skólastigum. Samstarfsaðilar eru allir þeir sem vinna að eða bjóða upp á fræðslu, innan eða utan hefðbundinna menntastofnana, hvort sem um er að ræða starfsmenntun, tómstundanám, bóklega eða verklega fræðslu.“ Þannig komst Arna Jakobína Björnsdóttir, stjórnarformaður SÍMEY, m.a. að orði í ávarpi sínu á ársfundi SÍMEY í húsnæði miðstöðvarinnar við Þórsstíg. Á fundinum fóru Arna Jakobína og Valgeir B. Magnússon, framkvæmdastjóri SÍMEY, yfir helstu atriði í starfsemi SÍMEY á árinu 2016 og framtiðarsýn. SÍMEY er nú á sínu átjánda starfsári og á þessum tíma hefur starfseminni vaxið fiskur um hrygg. Arna Jakobína sagði í ávarpi sínu að beint samband væri á milli stöðunnar á vinnumarkaði hverju sinni og sókn fólks í lengra nám. Um leið og atvinnuástandið batnaði minnkaði aðsókn í lengri námsleiðir símenntunarmiðstöðva um allt land. Um þessar mundir sagði Arna Jakobína að væri mikil spurn eftir námskeiðum og fyrirlestrum um samskipti og líðan á vinnustað, sem væri rökrétt þróun og ein birtingarmynd þeirra miklu breytinga sem íslenskt atvinnulíf hafi gengið í gegnum. „Á síðari árum er að aukast að fólk skipti um vinnu alla vega einu sinni á starfsævinni og hverfi jafnvel tímabundið af vinnumarkaði til að auka við sig menntun. Vaxandi er að fólki gefist kostur á að þróa sig áfram í starfi innan fyrirtækis og taka smám saman við stærri og meira krefjandi verkefnum þar. Að liðsinna starfsmönnum á „þeirra heimavelli“ við að auka færni sína og treysta samskiptin við samstarfsfólkið hefur farist SÍMEY einkar vel úr hendi. Það segir sína sögu að um 1.700 manns nýttu sér fyrirtækjaþjónustuna á árinu,“ sagði Arna Jakobína m.a. Ársreikningar SÍMEY voru kynntir og bornir upp til samþykktar. Rekstrartekjur stofnunarinnar á árinu 2016 námu kr. 217,3 milljónum króna en voru kr. 203,2 millónir. árið 2015 og hafa hækkað um 6,9% á milli ára. Hagnaður ársins nam kr. 3,9 milljónum í samanburði við kr. 6,3 milljóna króna tap árið 2015. Heildareignir námu í árslok kr. 119,9 milljónum króna og eigið fé var kr. 93,0 milljónir. Í skýrslu Valgeirs B. Magnússonar, framkvæmdastjóra SÍMEY, kom fram að á síðasta ári voru 11-12 starfsmenn hjá SÍMEY í 10 stöðugildum. Um 3.500 manns nýttu sér þjónustu SÍMEY á árinu samanborið við 3.800 árið 2015, fjöldi á námskeiðum var um 2.700 sem er ívið fleiri þátttakendur en árið á undan og náms- og starfsráðgjafarviðtöl voru 929 árið 2016 samanborið við 775 árið 2015. Þá fór 71 einstaklingur í raunfærnimat á vegum SÍMEY árið 2016 en árið 2015 voru þeir 50. Sem fyrr var á síðasta ári yfirgnæfandi fjöldi þátttakenda á námskeiðum hjá SÍMEY konur eða 1.769 en 892 karlar. Í lok samantektar sinnar fjallaði Valgeir framkvæmdastjóri um nokkur atriði sem verði ofarlega á baugi á þessu ári. Hann nefndi að tryggja verði sess framhaldsfræðslunnar í lögum um framhaldsfræðslu en hún hefur verið fjármögnuð í gegnum Fræðslusjóð. Valgeir segir að aukin áhersla verði lögð á náms- og starfsráðgjöf í atvinnulífinu, mannauðs- og fyrirtækjaráðgjöf og markþjálfun – auk þeirra hefðbundu verkefna sem SÍMEY hefur verið að sinna. Ný stjórn var kjörin á ársfundinum. Í henni eru fyrir hönd opinberra stétttarfélaga Arna Jakobína Björnsdóttir, til vara Hjördís Sigursteinsdóttir, fyrir hönd fræðslustofnana Jón Már Héðinsson, til vara Eyjólfur Guðmundsson, fyrir hönd opinberra fyrirtækja Hugrún Hjörleifsdóttir, til vara Ingimar Eydal, fyrir hönd almennra stéttarfélaga Anna Júlíusdóttir, til vara Halldór Óli Kjartansson, fyrir hönd almennra fyrirtækja Sverrir Gestsson, til vara Anna María Kristinsdóttir, fyrir hönd sveitarfélaga við Eyjafjörð Axel Grettisson, til vara María Albína Tryggvadóttir, fyrir hönd Akureyrarbæjar Halla Margrét Tryggvadóttir, til vara Hlynur Már Erlingsson.