Fréttir

Síðastliðið haust hóf SÍMEY samstarf við Slippinn Akureyri ehf. í framhaldi af því að fyrirtækið óskaði eftir greiningu á þörf fyrir fræðslu og menntun starfsmanna fyrirtækisins og tillögum um úrbætur í ýmsum málum er lúta að samskiptum, líðan og aðbúnaði starfsmanna. Gerður var samningur um verkefnið í septemberbyrjun 2016. Slippurinn gerði jafnframt samning við Iðuna fræðslusetur, endurmenntunarsjóðinn Landsmennt og Verkstjórasamband Íslands um „Fræðslustjóra að láni“. Ráðist var í þarfagreiningu innan Slippsins Akureyri eftir hugmyndafræði Markviss, en sú greining byggir á þörfum viðkomandi á fræðslu og öðru sem tengist uppbyggingu starfsmanna. Einnig var gerð viðhorfskönnun meðal starfsmanna og einnig farið í starfagreiningu. Stýrihópur var myndaður innan Slippsins og voru í honum sjö starfsmenn fyrirtækisins. Einnig vann Kristján Heiðar Kristjánsson mannauðs- og gæðastjóri Slippsins ötullega að verkefninu. Af hálfu SÍMEY hafa unnið að verkefninu Emil Bjarkar Björnsson, Helgi Þorbjörn Svavarsson og Ingunn Helga Bjarnadóttir. Frá því að verkefnið hófst í september sl. hafa verið haldnir fjórtán fundir, þ.m.t. fundir stýrihópsins og almennir starfsmannafundir. Lokafundur verkefnisins verður síðan haldinn að ca. hálfum mánuði liðnum. Þar er er ætlunin að kynna útfærða fræðsluáætlun fyrir 2017, sem ætlunin er að vinna eftir í framhaldinu. Kristján Heiðar Kristjánsson mannauðs- og gæðastjóri Slippsins Akureyri segist afar ánægður með hvernig til hafi tekist í samstarfi við SÍMEY. „Ég er gríðarlega ánægður með samstarfið og tel að verkefnið hafi tekist mjög vel. Þegar við fórum af stað með þetta verkefni vorum við að leita eftir sérfræðiráðgjöf í fræðslumálum fyrir starfsmenn fyrirtækisins en síðan Slippurinn Akureyri var settur á stofn hefur ekki verið ráðist í slíkt fræðsluátak fyrir starfsmenn fyrirtækisins,“ segir Kristján og upplýsir að heildarstarfsmannafjöldi Slippsins sé um 160 manns. „Það má segja að afurð þessarar vinnu síðan sl. haust sé beinagrind að fræðsluáætlun sem við ætlum okkur að byrja að vinna eftir strax núna á vorönn 2017 og horfum við til þess að eftir þessari fræðsluáætlun verði unnið til loka haustannar 2018. Fræðsluáætlunin tekur mið að óskum fólks innan fyrirtækisins en í stýrihópi verkefnisins voru fulltrúar sem komu úr mismunandi deildum fyrirtækisins. Það má því orða það svo að eignarhald þessa verkefnis sé í höndum starfsmannanna sjálfra. Við sjáum fyrir okkur að fræðsluáætlunin taki til um 140 af 160 starfsmönnum fyrirtækisins – þar er um að ræða starfsmenn „á gólfinu“ og millistjórnendur – þ.e. verkstjóra. Námskeiðin koma til með að verða bæði hér innan svæðisins og einnig verður leitað út fyrir athafnasvæði Slippsins,“ segir Kristján. Hann segist hafa væntingar um að þetta fræðsluátak muni skila sér í aukinni starfsánægju og fagþekkingu. „Almennt vil ég segja að sú vinna sem þegar hefur farið fram er fyllilega í takti við okkar væntingar. Af hálfu stjórnenda Slippsins er mikill skilningur á því að efla fræðslu starfsmanna og gefa þeim tíma til þess afla sér aukinna þekkingar,“ segir Kristján Heiðar Kristjánsson.

Aðsókn á fyrstu námskeiðin í FAB-Lab smiðjunni, sem er í húsakynnum Verkmenntaskólans á Akureyri, hefur farið fram úr öllum vonum. Fyrsta námskeiðið hófst í síðustu viku og nú þegar er fullbókað á næsta námskeið sem hefst 28. febrúar nk. Ekki er unnt að bæta við fleiri námskeiðum fram á vorið því hvert námkeið er 80 klukkustundir og lýkur námskeiðinu sem hefst 28. febrúar um miðjan maí. Nú þegar er farið að skrá niður fyrirspurnir á námskeið næsta haust. Á námskeiðunum kenna Helga Jónasardóttir, vöruhönnuður og kennari við listnámsbraut VMA, Halldór Grétar Svansson, þrívíddarhönnuður og Ólafur Pálmi Guðnason, sem kennir þrívíddarforritun. Föstudaginn 3. febrúar sl. var boðið til kaffisamsætis í FAB-Lab smiðjunni þar sem voru m.a. fulltrúar rekstraraðila smiðjunnar og þeirra fyrirtækja sem fjárhagslega hafa lagt henni lið við kaup á tækjabúnaði. Að FAB-Lab smiðjunni hafa staðið frá upphafi VMA, SÍMEY, Nýsköpunarmiðstöð Íslands og Akureyrarbær. Auk þess leggur Eyjafjarðarsveit smiðjunni til rekstrarframlag. Stofnsamningur um smiðjuna tekur til áranna 2016 til 2018. FAB-Lab smiðjan er ágætlega tækjum búin. Norðurorka lagði smiðjunni til myndarlega fjárupphæð til tækjakaupa. Einnig lögðu tækjakaupum lið KEA, SS Byggir, Höldur og Byggiðn – stéttarfélag. Fyrri part dags – til kl. 16 – nýta skólar á svæðinu smiðjuna en seinnipart dags eru þar námskeið á vegum SÍMEY og almenningur fær einnig aðgang að smiðjunni. Á FB-síðu smiðjunnar verður hægt að fylgjast með starfseminni og einnig verður settur upp sameiginlegur Snapchat-reikningur fyrir allar sjö FAB-Lab smiðjur landsins. Næstkomandi föstudaga, 17. febrúar, verður opið hús fyrir almenning í FAB-Lab smiðjunni í VMA, þar sem allir áhugasamir geta komið og kynnt sér starfsemina.

Sextíu nemendur brautskráðust frá Símenntunarmiðstöð Eyjafjarðar við hátíðlega athöfn í SÍMEY í gær. Jafnan er útskrifað tvisvar á ári – í lok haustannar og síðan aftur í lok vorannar. Áður en sjálf brautskráningin hófst fluttu Þórhildur Örvarsdóttir, söngkona, og Eyþór Ingi Jónsson, organisti, tvö jólalög af nýútkomnum diski Þórhildar, sem hún einfaldlega kallar Hátíð. Þau fluttu síðan eitt lag til viðbótar af diskinum við lok brautskráningarinnar. Sem fyrr segir brautskráðust að þessu sinni sextíu nemendur frá SÍMEY. Nám þeirra var eins og vera ber ólíkt. Nemendurnir komu af eftirtöldum brautum: „Help – Start“ - grunn og framhaldshópur, enskunám fyrir lesblinda, listasmiðja málun, listasmiðja teikning, Fræðsla í formi og lit, Skrifstofuskólinn dagnám, Skrifstofuskólinn kvöldnám og Leikskólaliða- og stuðningsfulltrúabrú. Valgeir Blöndal Magnússon, framkvæmdastjóri SÍMEY, og Helgi Þorbjörn Svavarsson, verkefnastjóri, önnuðust brautskráninguna. Auk brautskráningarræðu Valgeirs fluttu ávörp Hólmkell Hreinsson, amtsbókavörður, Magnea Karen Svavarsdóttir, einn nemendanna sem útskrifaðist úr Skrifstofuskólanum dagnámi, og Vésteinn Aðalgeirsson, sem hóf sitt nám í SÍMEY árið 2015 og var annar tveggja sem voru útnefndir í nóvember sl. til viðurkenningarinnar „Fyrirmynd í námi fullorðinna“. Hólmkell amtsbókavörður sagðist hafa fylgst vel með þróun SÍMEY, sem á sínum tíma hafi m.a. sprottið upp úr Menntasmiðju kvenna. Ánægjulegt hafi verið að fylgjast með því mikilvæga starfi sem unnið sé í SÍMEY í því skyni að hækka menntunarstigið á svæðinu. Nefndi Hólmkell að oft væri erfitt fyrir fólk að stíga út fyrir þægindarammann í daglegu lífi og setjast á skólabekk á nýjan leik, eftir langt hlé. Það þekkti hann sjálfur, því hann hafi stigið þetta skref á liðnu hausti þegar hann hóf fjarnám í opinberri stjórnsýslu við Háskóla Íslands. Erfiðast sé að taka ákvörðunina og stíga fyrstu skrefin, en síðan þegar yfir þröskuldinn sé komið sé ánægjan ein sem því fylgi að endurræsa hugann, ef svo megi segja. Hólmkell sagðist samfagna öllum þeim nemendur sem nú hefðu lokið góðum áfanga í SÍMEY og óskaði þeim til hamingju með daginn. Valgeir Magnússon, framkvæmdastjóri SÍMEY, sagði að með brautskráningunni væru nemendur að uppskera og dagurinn gæti líka verið dagur nýrra markmiða og væntinga. „Það getur verið mikið átak að taka upp þráðinn og hefja nám eftir hlé, það krefst dugnaðar og seiglu,“ sagði Valgeir. „Fólk þarf að endurskipuleggja líf sitt, reyna á nýja færni og stundum yfirvinna huglæga þröskulda sem geta fylgt okkur. Fyrir okkur sem vinnum á þessum vettvangi er þessi dagur líka afar mikilvægur því á honum kristallast tilgangurinn með starfi okkar, þegar við finnum, heyrum og sjáum tilganginn með þessu öllu, sjáum þær breytingar sem hafa orðið hjá ykkur. Einhvers staðar segir að það að geta haft áhrif á aðra mannskju til góðs er það mikilvægasta í lífinu. Hugtakið ævimenntun er orðið tamt í notkun í umræðu um menntamál en eins og orðið felur í sér er öflun nýrrar þekkingar og aðlögun að því hluti af lífi okkar. Þetta er breytt heimsmynd frá því fyrir einhverjum árum og áratugum, þegar fólk lauk námi upp úr 20 ára aldri eða var í sama starfi alla ævi. Þekkingarleit og öflun nýrrar reynslu á vinnumarkaði er orðin eðlileg krafa í dag. Nám hefur gjarnan mikil áhrif á sjálfsmynd einstaklinga, uppgötvun nýrra hæfileika sem maður hélt að væru ekki til staðar eða horfnir er afar jákvæð og hefur sterk áhrif á einstaklinga. Viðhorf gagnvart starfsumhvefi breytist, öryggi og viðsýni tekur völdin í huga einstaklinga. Ný tengsl myndast fólks á milli og þann þátt að læra af öðrum skal ekki vanmeta í námi. Öll eigum við okkur drauma eða við eigum að eiga okkur drauma. Ekki er óalgengt að við ýtum draumum okkar til hliðar vegna álags í persónulegu lífi eða vegna starfskrafna. Það getur verið erfitt að finna rétta tímann og erfitt að koma sér af stað. Af hverju ætti ég að vera að standa í þessu? En löngunin til að fara út fyrir þægindahringinn getur verið sterk og breytir lífi okkar. Margir taka þó ekki skrefið en það er okkar hlutverk sem stöfum á þessum vettvangi að hvetja og veita góð ráð,“ sagði Valgeir. SÍMEY er sjálfseignarstofnun, stofnuð af samfélaginu, atvinnulífi, stéttarfélögum, skólakerfinu og sveitarfélögum. SÍMEY er hluti af samstarfsneti símenntunarmiðstöðva á landinu undir merkjum Kvasis. Á síðasta ári voru þátttakendur eða þeir sem nýttu sér þjónustu SÍMEY um 3900 manns. Valgeir gat í ræðu sinni starfsmannabreytinga hjá SÍMEY á haustdögum. Erla Björg Guðmundsdóttir, sem var framkvæmdastjóri SÍMEY, hvarf til annarra starfa og sömuleiðis Hildur Bettý Kristjánsdóttir, verkefnastjóri. Í þeirra stað voru ráðnar til starfa Svanfríður Inga Jónasdóttir, verkefnastjóri á Dalvík, og Ingunn Helga Bjarnadóttir, verkefnastjóri á Akureyri. Þakkaði Valgeir Erlu og Hildi fyrir afar gott starf fyrir SÍMEY og bauð þær Svanfríði og Ingunni velkomna í starfsmannahópinn. „Verkefni okkar eru á víðum grunni, stór hluti starfseminnar er að bjóða fullorðnu fólki upp á vottaðar námsleiðir frá Fræðslumiðstöð atvinnulífsins, raunfærnimat, náms- og starfsráðgjöf, almennt námskeiðahald fyrir samfélagið og einnig klæðskersniðnar lausnir fyrir fyrirtæki og stofnanir í formi námskeiðahalds og mannauðsráðgjafar, íslensku fyrir útlendinga og námskeiðahald fyrir Fjömennt, sem er fullorðinsfræðsla fyrir fatlaða. Einnig sinnum við þróunarstarfi af ýmsum toga. Framhaldsfræðslukerfið er ungt að árum á Íslandi en mikill vöxtur hefur verið innan þess á síðustu árum og er hér um að ræða fimmtu stoð menntakerfisins, reikna má að um 15.000 nemendur stundi nám innan þessa kerfis á landsvísu, til samanburðar er það um helmingur af fjölda nemenda í framhaldsskólakerfinu. Þessi hópur er afar dýrmætur fyrir samfélag og atvinnulíf, kemur með dýrmæta starfreynslu og reynslu úr sínu persónulega lífi, tvíeflist gjarnan í námi og kemur með enn dýrmætari þekkingu og reynslu út í atvinnulífið og sitt samfélag, þessi hópur er að hækka menntunarstig þjóðarinnar og er ég að tala um ykkur kæru útskriftarnemendur, þið eruð að að hækka menntunarstig þjóðarinnar og það skiptir miklu máli,“ sagði Valgeir Magnússon.

Magnea Karen Svavarsdóttir er gott dæmi um nemanda sem námið í SÍMEY hefur orðið til að hvetja til dáða til frekara náms. Hún flutti eftirtektarvert ávarp við útskrift í SÍMEY í gær þar sem hún sagði sína sögu. Magnea Karen býr á Akureyri, er gift þriggja barna móðir og á auk þess stjúpson. Hún er frá Hellu, þar sem hún var í grunnskóla. Námið í þá daga gekk ekki vel, trúlega vegna þess að Magnea Karen er lesblind, en hún fékk að heyra að hún væri „tossi og vitleysingur“ sem ekkert gæti lært. „Það samt stoppaði mig ekki í því að fara í Fjölbrautarskóla Suðurlands á Selfossi þar sem ég lærði nú samt ekki neitt, var aðallega í kossaflensi og keleríi við strákana, enda hafði ég enga trú á að ég gæti lært. Nokkrum árum síðar fór ég í söðlasmíði á Selfossi, sem var mjög áhugavert og gaman og mér gekk glimrandi vel. Um þessar mundir eru 10 ár frá því ég útskrifaðist úr Hússtjórnarskólanum á Hallormsstað með næsthæstu einkunn,“ rifjaði Magnea Karen upp og bætti við að hana hafi alltaf langað í frekara nám en aldrei komið sér í það. „Fyrir tveimur árum veiktist ég af krabbameini sem er búin að vera mjög erfið ganga og er að ná mér hægt og rólega af þeim veikindum. Síðan ég veiktist hef ég ekkert getað unnið. En til þess að nýta tímann á meðan ég er að ná heilsu á ný og líka til að koma mér út úr húsi ákvað ég að fara í skrifstofuskólann hér hjá SÍMEY. Að auki fór ég í enskunám í „Help – Start“ og er að klára 3. önnina í því námi. Þegar ég skráði mig í skrifstofuskólann var það ekki efst í huga mínum og reyndar hvergi í huganum að fara að halda ræðu hér við útskriftina okkar. En Helgi Svavarsson seldi mér þá hugmynd og ég skil ekki af hverju ég keypti hana. En hann náði að draga mig langt út fyrir þægindarammann minn og hafði fulla trú á mér. Og hingað er ég komin og er stolt af sjálfri mér, því ekki er ég mikið fyrir að halda ræður. Takk Helgi, fyrir að trúa mér fyrir þessu verkefni.“ Magnea Karen sagðist hafa farið í námið í SÍMEY til þess að auka möguleika sína á vinnumarkaði og ekki síst að auka möguleika sína að skipta um starfsvettvang, því vinnan sem hún hafi verið þar til hún greindist með krabbameinið hafi verið líkamlega krefjandi og vandséð að hún geti tekist á við slíka vinnu aftur. „Þegar ég byrjaði í skrifstofuskólanum, leið mér strax vel. Andrúmsloftið er gott, það er kósý að koma og manni líður vel. En svo byrjaði hópefli hjá Önnu Richards. Það var pínu spes til að byrja með og á köflum leið mér eins og kjána. Þegar ég átti að taka þátt í að semja nútímadansverk og vera í faðmlögum við konur sem ég hafði þekkt í hálftíma, fór ég að hugsa; hvert í fjandanum er ég komin? Þegar fyrsta skelfingin var yfirunnin var þetta bara gaman. Anna Richards náði að hrista okkur vel saman í byrjun og síðan höfum við ekki hætt að dansa og faðmast. Námið hér hefur verið mjög skemmtilegt, áhugavert og gefandi og kennararnir frábærir. Hópurinn sem ég var með í náminu var æðislegur. Mikið búið að hlæja og það þurfti að sussa nokkrum sinnum á okkur Þetta voru allt saman konur á misjöfnum aldri. Þannig að við þessar ungu gátum alveg talað við gömlu kellurnar sem voru með okkur og getum það enn. Þetta hefur meira að segja gengið svo langt að við ætlum að halda áfram að hittast að þessu námi loknu. Helgi Kristins hefur sýnt okkur alveg eindæma þolinmæði, sérstaklega þessum gömlu, náttúrlega. Nei, ég verð víst að viðurkenna að hann þurfti að sýna mér töluverða þolinmæði þar sem ég hélt því statt og stöðugt fram að tölvan mín væri eitthvað biluð því ég fékk yfirleitt ekki það sama á skjáinn og hinar, það var náttúrlega tölvan en ekki ég að gera einhverja vitleysu. Hann sagði oftar en einu sinni við mig: „Ég held að þú sért búin að slá heimsmet, því þetta á ekki að vera hægt að gera á tölvu.“ Samnemendur mínir skemmtu sér konunglega yfir þessari biluðu tölvu og sú sem sat við hliðina á mér alla tölvutímana hefur sjaldan skemmt sér svona vel í neinu námi. Hrefnu Óla tókst að gera verslunarreikning að skemmtilegu fagi og Guðlaug kenndi okkur á bókhaldið þannig að skattaskýrslan verður auðveld þetta árið. „Help Start“, þar sem Kristín Kolbeins hefur verið að stauta ofan í mann ensku, enska stafsetningu og framburð, hefur einnig verður skemmtilegt og þar er ég líka í góðum félagsskap.“ Magnea Karen sagði í lok ávarp síns að hún væri ekkert á þeim buxunum að hætta að læra, þó svo að áfanganum í gær væri náð. „Ég ætla að halda áfram í enskunni, langar að bæta við mig í skrifstofunáminu einhvern veginn og langar bara að gera alveg helling af allskonar. Ég á ábyggilega eftir að vera með annan fótinn hér í SÍMEY áfram einhvern tíma í viðbót. Ég er farin að trúa því að ég geti lært, ég veit að ég get lært,“ sagði Magnea Karen og þakkaði kennurum og samnemendum sínum fyrir samveruna um leið og hún óskaði viðstöddum gleðiríkrar jólhahátíðar.

Fyrr í þessum mánuði var Krabbameinsfélagi Akureyrar og nágrennis afhent 95 þúsund króna peningagjöf, sem var afrakstur námskeiðs sem Kristín Steindórsdóttir, næringaþerapisti og jógakennari, hélt í SÍMEY 29. október sl. Í sameiningu héldu Kristín og SÍMEY námskeið þar sem auglýst var að allur ágóði rynni til Krabbameinsfélags Akureyrar og nágrenni og gaf Nettó allt hráefni á námskeiðið og lagði um leið góðu málefni lið. Ekki þarf að orðlengja það að afar góð aðsókn var á námskeiðið, þar sem Kristín Steindórsdóttir deildi reynslu sinni af breyttu mataræði og heilsusamlegri lífsstíl, sem næst fimmtíu manns sóttu námskeiðið. Hver þátttakandi greiddi 2000 kr. í námskeiðsgjald og þegar upp var staðið söfnuðust 95 þúsund krónur sem Kristín Steindórsdóttir og Kristín Björk Gunnarsdóttir, verkefnastjóri hjá SÍMEY, afhentu Halldóru Björg Sævarsdóttur, framkvæmdastjóra Krabbameinsfélagi Akureyrar og nágrennis.

Í dag var formlega opnuð í Galleríi SÍMEY sýning á verkum nemenda á þremur myndlistarnámskeiðum sem Bryndís Arnardóttir – Billa hefur haft umsjón með. Í fyrsta lagi er um að ræða námskeiðið „fræðsla í formi og lit“, í öðru lagi „smiðja – málun“ og í þriðja lagi „smiðja – teikning“. Árið 2013 hóf Billa að bjóða upp á þessi námskeið fyrir 20 ára og eldri í SÍMEY – í samræmi við markmið símenntunarstöðva - og skrifaði hún námsskrár fyrir námið sem voru síðan samþykktar af mennta- og menningarmálaráðuneytinu. Frá byrjun hafa þessi námskeið verið afar vinsæl og hafa færri komist að en vilja. Í vetur hafa um þrjátíu manns verið á námskeiðunum, tíu í hverjum hópi, og segist Billa ekki vilja hafa fleiri nemendur, enda sé um einstaklingsmiðað nám að ræða og því þurfi að gefast tóm til þess að fylgja hverjum og einum nemanda eftir. Í hvorri smiðju er kennt í áttatíu kennslustundir en kennstundirnar í fræðslu í formi og lit eru tvö hundruð. Billa hefur kennt listnám til fjölda ára. Árum saman var hún kennari við listnámsbraut VMA en síðan stofnaði hún eigið fyrirtæki, Listfræðsluna, og hefur kennt myndlist á námskeiðum í SÍMEY undanfarin ár. Eins og undanfarna vetur mun Billa fara til Orlando í Flórída eftir áramót þar sem hún kennir við háskóla (þar sem nemendur eru um 78 þúsund) verðandi myndlistarkennurum. Á vorönn mun Guðmundur Ármann Sigurjónsson, sem einnig er margreyndur myndlistarkennari, kenna framhaldsnámskeið í fræðslu í formi og lit. Hér eru upplýsingar og skráning á námskeið. Valgeir Blöndal Magnússon, framkvæmdastjóri SÍMEY, upplýsti við opnun sýningarinnar í dag að námskeiðið „fræðsla í formi og lit“ hafi nú fengið formlega vottun frá mennta- og menningarmálaráðuneytinu og að óbreyttu tekur hún gildi frá áramótum. Þetta þýðir að námskeiðið gefur ákveðinn fjölda eining til náms í framhaldsskóla. Smiðjunámskeiðin – í málun og teikningu – eru nú í slíku vottunarferli. Fjölbreytnin í myndverkum nemenda á sýninginnu í Galleríi SÍMEY er allsráðandi. Hér má sjá dæmi um verk á sýningunni. Vert er að taka fram að fólki er velkomið að koma í SÍMEY á opnunartíma til 21. desember og skoða verkin. Billa segir afskaplega ánægjulegt að fylgja nemendum í gegnum það ferli að láta gamlan draum um að mála eða teikna rætast. Í mörgum tilfellum hafi fólk lengi ætlað sér að taka skrefið en ekki látið verða af því, fyrr en nú. Hún nefndi að einstaklega mikil samkennd og vinskapur hafi einkennt nemendur á námskeiðunum núna á haustönn. „Þau tengsl sem ég hef upplifað í þessum námshópum eru einstök og myndast ekki nema fyrir það að þetta fólk er alveg einstakt,“ sagði Billa.

Akureyringurinn Vésteinn Aðalgeirsson var annar tveggja sem fékk viðurkenningu sem fyrirmynd í námi fullorðinna á ársfundi Fræðslumiðstöðvar atvinnulífsins þann 30. nóvember sl. Hann er 51 árs gamall en hefur undanfarna þrjá áratugi verið til sjós, samfleytt síðustu 28 ár, fyrst í þrjú ár, frá 1988 til 1991, hjá Útgerðarfélagi Akureyringa, en síðan á fimm skipum Samherja hf., lengi sem bátsmaður en er nú háseti á Vilhelm Þorsteinssyni EA-11. Vésteinn segist lengi hafa haft hjá sér opin augu fyrir því að ná sér í aukna þekkingu. Hann hafi vitað lengi af endurmenntunarsjóði sjómanna en síðan hafi hreyfing komist á málin þegar Sjómennt hafi í upphafi árs 2015 gert samning við símenntunarstöðvar um allt land. Hann hafi hlýtt á kynningu á þessum samningi hjá SÍMEY og hún hafi vakið sinn áhuga að taka nú það skref sem hann hafi lengi verið með í huga. Til að byrja með fór hann í Sjósóknarverkefnið svokallaða og fór þar í gegnum raunfærnimat í fiskvinnslu og -veiðum. Hann hafði í huga að auka færni sína í ennsku, enda sagðist hafa lengi verið grúskari í tölvum, ekki síst í excel, en fann að hann þyrfti á því að halda að bæta sig í enskunni. Því innritaði hann sig í ensku 103 í fjarnámi hjá Menntastoðum. Og þegar þarna var komið sögu ákvað Vésteinn vorið 2015 að innrita sig í námið Mareltækni, sem Fisktækniskólinn og Marel standa í sameiningu að. Haustönninni 2015 var fyrst og fremst varið í upplýsingatækninám en eftir áramót, á vorönn 2016, tók tæknihlutinn við og þá var sjónum m.a. beint að þeim tæknilausnum sem Marel vinnur að í framleiðslu sinni á fiskvinnsluvélum o.fl. Náminu var síðan haldið áfram núna á haustönn og í þessari viku lauk því síðan. Vésteinn er í öðrum hópnum sem lýkur Mareltækninum, fyrsti hópurinn lauk sínu námi vorið 2015. Sem afsprengi af þessu námi, ef svo má segja, gafst Vésteini kostur á því að fara ásamt fleirum í nokkurra daga ferð til Portúgal í nóvember sl. Ferðin var farin í tengslum við Erasmus samstarfsverkefni Fisktækniskólans og skóla í Portúgal. Í þessari námsferð voru fjölmörg fyrirtæki heimsótt í því skyni að skoða fyrst og fremst saltfiskvinnslu þar í landi. Vésteinn segir að það hafi vissulega verið töluverð viðbrigði að setja sig í námsgírinn, enda hafi hann ekki setið á skólabekk síðan í Lundi í Öxarfirði fyrir margt löngu. En námstíminn hafi verið sér mjög góður og gagnlegur og til þess fallinn að auka möguleika sína á vinnumarkaði. Hann segist hafa verið minna á sjó á þessu ári en áður til þess að geta stundað námið. Mikilvægur þáttur í þessu segir hann hafa verið að Samherji hf. hafi verið tilbúinn að leggja honum lið og greiða hans götu í náminu. „Ég er mjög sáttur við að hafa drifið í því að fara í þetta nám. Öll þekking er af hinu góða, ekki síst varðandi tölvur og tækni. Það var gott og afar gagnlegt að víkka út sjóndeildarhringinn og horfa í kringum sig og jafnframt var ákveðin afþreying í því fólgin að fara í þetta nám og brjóta upp hversdagslega rútínu,“ segir Vésteinn Aðalgeirsson. Á hópmyndinni sem var tekin þegar Vésteinn tók á móti viðurkenningunni á ársfundi Fræðslumiðstöðvar atvinnulífsins eru frá vinstri: Halldór Grönvold stjórnarformaður FA, Valgeir Magnússon framkvæmdastjóri SÍMEY, Vésteinn Aðalgeirsson, Souleymane Sonde, sem einnig fékk viðurkenningu sem fyrirmynd í námi fullorðinna, Sólveig H. Bjarnadóttir framkvæmdastjóri Mími símenntun, Guðný Ásta Snorradóttir Mími símenntun, Sveinn Aðalsteinsson framkvæmdastjóri FA. Að launum fengu Vésteinn og Souleymane Sonde blómvönd og spjaldtölvu.

Í gær var síðasti dagur þriðja hópsins sem lýkur staðarnámi í markþjálfun í SÍMEY. Að þessu sinni luku sex náminu og fengu viðurkenningaskjöl því til staðfestingar. Leiðbeinandi á námskeiðinu var sem fyrr Matilda Gregersdotter, MCC vottaður markþjálfi hjá International Coach Federation og hefur hún hannað ACSTH (Approved Coach Specific Training Hours) vottað prógram hjá International Coach Federation. Fyrir ári síðan var fyrsta slíka námskeiðið haldið á Akureyri – raunar fyrsta markþjálfanámskeiðið utan Reykjavíkur. Matilda setti árið 2004 á stofn fyrirtækið Leiðtoga sem fjórum árum síðar breyttist í Evolvia ehf. og það hefur í dag á sínum snærum markþjálfanám hér á landi. Frá sama tíma hefur Evolvia haft ACSTH vottun frá International Coach Federation sem þýðir að ACC markþjálfanám og framhaldsnám í markþjálfun hjá Evolvia er viðurkennt og uppfyllir öll skilyrði og kröfur ICF (International Coach Federation). Námið í SÍMEY er grunnnám í markþjálfun, svokallað ACC markþjálfanám og sem fyrr segir luku fimm konur staðarnáminu og fengu viðurkenningarskjal því til staðfestingar. Námi sexmenninganna er þó ekki að fullu lokið því í vetur munu þeir verða þjálfaðir í því að veita markþjálfun í netumhverfi. Markþjálfun verður ekki svo auðveldlega skilgreind eða lýst í einni setningu. Matilda Gregersdotter segir að markþjálfun megi e.t.v. lýsa sem samtalsaðferð þar sem einstaklingurinn læri m.a. ýmislegt um sjálfan sig, varðandi lífið sjálft og starf hvers og eins. Sem fyrr segir er um að ræða grunnnám í markþjálfun en síðan er unnt að fara í framhald og öðlast þannig alþjóðlega vottun sem markþjálfi. Hér segir einmitt frá nemendum sem tóku grunnnámið á Akureyri og héldu síðan áfram í framhaldsnám. Þrjú námskeið í markþjálfun eru sem sagt að baki á Akureyri og það fjórða er á dagskrá eftir áramótin. Hér eru allar upplýsingar og skráning á það námskeið. Á þessari mynd, sem var tekin við lok námskeiðsins í gær, eru frá vinstri: Helgi Þorbjörn Svavarsson, María Hólmgrímsdóttir, Kristín Irene Valdemarsdóttir, Brynhildur Óladóttir, Sigurbjörg Ósk Sigurðardóttir og Matilde Gregersdotter kennari.

Símenntunarmiðstöð Eyjafjarðar vill í auknum mæli leggja áherslu á þjónusta fyrirtæki og stofnanir, án þess þó að slaka á í framboði á fjölbreyttum námskeiðum fyrir einstaklinga. Liður í því að kynna aukna sókn SÍMEY inn á fyrirtækjamarkaðinn var útgáfa á bæklingi, sem er byrjað að dreifa til fyrirtækja og stofnana. Þar eru kynntir þeir margþættu möguleikar sem atvinnulífinu stendur til boða, því óhætt er að segja að þar sé af mörgu af taka – eins og t.d. ráðgjöf, námskeiðahald, markþjálfun og þarfagreiningu. Á heimasíðu SÍMEY eru alltaf nýjustu upplýsingar um þau námskeið sem eru í boði hverju sinni og er óhætt að segja að þau séu af ýmsum toga. Finni stjórnendur fyrirtækja ekki námskeið sem þeim hentar er SÍMEY tilbúin til að sérsníða þau að þörfum viðkomandi fyrirtækja. Einnig er boðið upp á styttri fyrirlestra, skipulagningu hópeflis, starfsdaga eða funda. SÍMEY hefur nú þegar unnið mikið með mörgum fyrirtækjum á Eyjafjarðarsvæðinu. Nægir þar að nefna Samherja, Akureyrarbæ og Höld. Reynslan af samstarfinu við þessi tvö stóru eyfirsku fyrirtæki og Akureyrarbæ var almennt mjög jákvæð. Til margra ára hefur SÍMEY starfað náið með Fræðslumiðstöð atvinnulífsins og nú hefur SÍMEY tekið upp samstarf við Hagvang um fræðslumál í fyrirtækjum og stofnunum og námskeiðahald. Hinn nýi bæklingur, þar sem leitast er við að varpa ljósi á starfsemi SÍMEY á fyrirtækjasviði, er 24 síður. Auk ítarlegra upplýsinga í bæklingnum um það sem SÍMEY getur boðið upp á á þessu sviði er hann ríkulega myndskreyttur. Starfsmenn Símenntunarmiðstöðvar Eyjafjarðar eru sem fyrr tilbúnir að koma í fyrirtæki og stofnanir og kynna það sem hún hefur upp á að bjóða á þessu sviði.

Símenntunarmiðstöð Eyjafjarðar er einn af aðilum að FabLab-smiðju – FabEY - sem að undanförnu hefur verið unnið hörðum höndum að því að standsetja í húsnæði VMA. Nú hefur SÍMEY auglýst opna smiðju í FabLab, sem hefst í febrúar á næsta ári fyrir 20 ára og eldri. Um er að ræða 80 klukkustunda smiðju, þar af eru 13 klukkustundir ætlaðar í fabóklega kennslu. Jón Þór Sigurðsson hefur verið ráðinn verkefnastjóri hinnar nýju FabLab-smiðju í VMA og hefur hann að undanförnu verið að standsetja rými smiðjunnar, sem er að stærstum hluta í tveimur kennslustofum sem rafiðnaðardeild VMA hafði áður til afnota. Tækjabúnaður smiðjunnar er að stórum hluta kominn á sinn stað – þ.m.t. tvær laserskurðarvélar, lítill fræsari, fjórir þrívíddarprentarar og vínilskeri. Til viðbótar er von á stórum svokölluðum CNC-fræsara og einnig er þessa dagana að koma í hús tölvubúnaður fyrir notendur smiðjunnar. Bóklega kennslan fer fram í minna rýminu – tölvustofunni – en verklegi hlutinn verður í rýmri stofunni. Nú þegar er byrjað að prufukeyra búnaðinn í FabLab-smiðjunni og lofar þær tilraunir góðu. Gera má ráð fyrir að smiðjan verði komin í næsta mánuði eða byrjun næsta árs í endanlega mynd og þá verður hægt að bjóða fólki að nota hana. Fyrri hluta dags er miðað við að smiðjan verði nýtt af nemendum grunn-, framhaldsskóla og háskóla en seinni part dags nýti aðrir smiðjuna, þar á meðal þeir sem skrá sig í FabLab-smiðju SÍMEY. Jón Þór Sigurðsson er Akureyringur í húð og hár. Hann á að baki þrjú ár í marmiðlunarhönnun í Barcelona á Spáni og síðan tók hann eitt ár til meistaraprófs í stafrænum arkitektúr. Stofnfundur félagsins FabEy, hollvinafélags um stofnun og rekstur smiðjunnar, var haldinn á Akureyri fyrir nákvæmlega ári, 12. nóvember 2015. Samþykktir FabEy staðfestu fulltrúar Nýsköpunarmiðstöðvar Íslands, Verkmenntaskólans á Akureyri, Akureyrarbæjar og SÍMEY. Í samþykktum fyrir FabEy kemur fram að með rekstri á stafrænni smiðju í Eyjafirði sé stefnt að því að auka þekkingu skólafólks og almennings á persónumiðaðri framleiðslu og stafrænum framleiðsluaðferðum, verkefninu sé ætlað að auka áhuga á verk- og tækninámi í grunn- og framhaldsskólum og efla hæfni til nýsköpunar í námi og atvinnulífi. Þá er einnig tilgreint það markmið með verkefninu að skapa vettvang fyrir nýsköpun og efla samkeppnishæfni fyrirtækja, menntastofnana og nemenda. FabLab stendur fyrir „Fabrication Laboratory“ og er alþjóðlegt net stafrænna smiðja með tækjum og tólum til að búa til nánast hvað sem er. FabLab gefur fólki á öllum aldri tækifæri til þess að þjálfa sköpunargáfuna og hrinda hugmyndum sínum í framkvæmd með því að hanna, móta og framleiða hluti með aðstoð stafrænnar tækni. Í FabLab smiðjum er tækjabúnaður af fullkomnustu gerð; fræsivél, vinylskeri, laserskeri, þrívíddarprentarar, rafeindaverkstæði til ýmiskonar tækjasmíða, rammar og efni til þess að þrykkja t.d. á boli, borðtölvur með uppsettum forritum o.fl. Reynslan af FabLab smiðjunum sem þegar hefur verið komið á fót hér á landi sýnir að tæknilæsi og tæknifærni almennings eykst og þær hvetja ungt fólk til tæknimenntunar, sem mikil þörf er á, þær auka þekkingu á persónumiðaðri framleiðslu, stafrænum framleiðsluaðferðum í iðnaði og síðast en ekki síst eru FabLab smiðjurnar til þess fallnar að efla nýsköpun í landinu. Eigandi Fab Lab vörumerkisins er Massachusetts Institute of Technology í Bandaríkjunum en Nýsköpunarmiðstöð Íslands hefur umsjón með verkefninu á Íslandi. Áhersla er lögð á samstarf FabLab smiðjanna á Íslandi og mynda þær samstarfsvettvang, „FabLab Ísland”, þar sem þekkingu og reynslu er miðlað milli þeirra. FabEy mun verða þátttakandi í þessu samstarfi. Á næsta ári verður Fab Lab stafrænni smiðju í Eyjafirði ýtt úr vör og verður hún til húsa hér í VMA. Fab Lab smiðjan er ætluð frumkvöðlum, nemendum, almenningi, fyrirtækjum og stofnunum. Lengi hefur verið beðið eftir því að slíkri smiðju yrði komið á fót hér á svæðinu og nú er það loks að verða að veruleika. Við það er miðað að smiðjan verði tilbúin í húsakynnum VMA við upphaf næsta skólaárs. FabEy mun gera samstarfssamning við VMA um rekstur Fab Lab smiðjunnar. Stefnt er að því að ráða tvo starfsmenn að smiðjunni. Þau Sigríður Huld, aðstoðarskólameistari, og Benedikt Barðason, áfangastjóri, fagna þessum áfanga sérstaklega fyrir skólastarf í VMA og þau eru sannfærð um að smiðjan muni nýtast sérlega vel fyrir margar deildir skólans. En auk þess undirstrika þau að þó svo að smiðjan verði staðsett í húsakynnum VMA sé hún ekki bara hugsuð fyrir VMA, hún sé fyrir nemendur á öllum skólastigum, fyrirtæki, stofnanir og allan almenning sem hafi áhuga á að tileinka sér þessa tækni. Auk Akureyrar hafa sveitarfélög við Eyjafjörð sýnt mikinn áhuga á verkefninu og mun FabEy gera sérstaka samninga við hvert og eitt sveitarfélag sem vill taka þátt. Nú þegar hafa Eyjafjarðarsveit og Hörgárbyggð ákveðið að koma að verkefninu. Auk þess hafa fagfélög við Eyjafjörð lofað stuðningi.